बागमती प्रदेश सहकारी तथा गरिबी निवारण मन्त्री बिनु रायमाझीले सहकारी ऐनलाई संशोधन गरेर भए पनि अभियानमा देखिएका विद्यमान चुनौतिहरुको सामना गर्दै निकास दिने बताएकी छन् । राष्ट्रिय सहकारी महासंघले चैत्र २६ र २७ गते काठमाडौंमा सञ्चालन गरेको “सहकारी संघ÷संस्था सुदृढीकरण तथा आन्तरिक लेखा प्रणाली सम्बन्धी बागमती प्रदेश स्तरीय अन्तरक्रिया कार्यको प्रमुख अतिथिको रुपमा बोल्दै सो कुरा बताएकी हुन् ।

उनले सहकारी अभियानमा देखिएका विद्यामान समस्याहरुको समाधान गर्न र निकास दिन सहकारी ऐन  पर्याप्त नभएकाले  ऐन संशोधनको प्रकृया शुरु भइसकेको  जानकारी दिइन् । मन्त्री रायमाझीले सहकारी संस्थाहरुलाई समस्याग्रस्त घोषणा गरेर मात्र समस्याको समाधान नहुने बताइन् । उनले सदस्यहरु आपसमा मिलेर नै समस्याको समाधान गर्न सकिने भएको हुँदा सदस्यहरु बीचमा सहकार्य हुनुपर्ने  जोड दिइन् ।  

राष्ट्रिय सहकारी महासंघका कार्य वाहक अध्यक्ष रमेश प्रसाद पोखरेलले सहकारी संघ÷संस्थाहरुलाई सुशासित, पारदर्शी र सदस्यमैत्री बनाउन लेखा सुपरीवेक्षण समितिलाई प्रभावकारी बनउन आग्रह गर्दै लेखा समिति सञ्चालक समिति भन्दा शक्तिशाली भएको बताए । उनले शेयर सदस्यहरु  नै सहकारी संघ÷संस्थाहरुको वास्तबिक मालिक भएको उल्लेख गर्दै केही लोभीपापी ब्यक्तिहरुका कारण सहकारी बदनाम भएको बताए । उक्त कार्यक्रमका अर्का बक्ता महासंघका उपाध्यक्ष डि.बि.बस्नेतले लेखा सुपरीवेक्षण समितिको अधिकार र जिम्मेवारीमाथि प्रकाश पार्दै लेखा समिति निष्कृय भएकै कारण सहकारीमा समस्या आएको बताउँदै लेखा समितिमा बस्ने ब्यक्ति दक्ष, सचेत र चुस्त हुनुपर्नेमा जोड दिए ।

उक्त अन्तरकृया कार्यक्रमको समापन समारोहमा सहभागीहरुलाई प्रमाणपत्र वितरण गर्दै महासंघका महाप्रबन्धक डा.बाबुकाजी थापाले शेयर सदस्यहरु आपसमा मिलेर सहकारी संस्था दर्ता र सञ्चालन गर्ने फेरि हामी नै सहकारीमा समस्या आयो भनेर सरकारसंग हारगुहार गनु लाजमर्दो भएको बताए ।

उनले सहकारीकर्मीहरु आपसमा मिलेर स्वनियम, पारदर्शिता र सुशासन कायम गरेर सहकारी संघ÷संस्थालाई अगाडि बढाउनुपर्ने बताए । महासंघका वरिष्ठ प्रबन्धक गोपीकृष्ण भण्डारीले सञ्चालन गरेको उक्त अन्तरक्रिया कार्यक्रममा पूर्व सचिव गोपीनाथ मैनालीले ‘सहकारी संस्थाहरुमा पारदर्शिता, आन्तरिक लेखा प्रणाली र सहकारी सुशासन’, संघीय सहकारी बिभागका उपरजिष्ट्रार शशी कुमार लम्सालले ‘सहकारीको स्वनियमन, सुशासन र राज्यको नीतिगत ब्यवस्था’ र बागमती प्रदेश रजिष्ट्रारको कार्यालयका शाखा अधिकृत राम प्रसाद गजुरेलले ‘सहकारी सेवा सुधार विविधीकरण र आर्थिक अनुशासन तथा जोखिम ब्यवस्थापनमा कानूनी व्यवस्था’ विषयमा प्रशिक्षण  दिएका थिए । अन्तरकृया कार्यक्रमका सहभागीले पछिल्ला एकाध वर्षदेखि सहकारी क्षेत्रमा देखिएका समस्याप्रति चिन्ता ब्यक्त गर्दै सबै सहकारीकर्मीहरु मिलेर अभियानलाई बचाउनु पर्नेमा जोड दिएका छन् ।

उक्त तालिमको समूहगत छलफलका क्रममा सहभागीहरुले उठाएका बिभिन्न सवालहरुका बारेमा चर्चा गर्दै सहभागी रमेश के.सी.ले तालिमको व्यवस्थापकीय पक्ष राम्रो रहेको र सहकारीको बुझाईमा थप स्पष्टता भएको बताए । साथै  उनले  तालिमबाट सिकेको सैद्धान्तिक ज्ञानलाई ब्यबहारमा उतार्न सकेमा सहकारी अभियानमा देखिएका समस्याहरु समाधान हुनुकासाथै सुधार हुँदै जाने बताए । सहकारीमा स्वनियमन ओझेलमा परेको र सुशासनमा कमी भएको स्वीकार गर्दै सहकारीका नीति÷नियम र कानूनहरुको अक्षरस परिपालना गरेमा समस्या समाधान हुने उनको भनाई छ ।