नेशनल डेभलपमेन्ट को–अपरेटिभ सोसाइटी लिमिटेडको अध्यक्षमा राजेश राजदली निर्विरोध चयन भएका छन् । संस्थाका कार्यकारी अध्यक्ष राजेशहरि जोशीको हृदयाघातका कारण गत जेठ महिनामा निधन भएपछि संस्थाको रिक्त अध्यक्ष पदमा राजदली चयन भएका हुन् ।
त्यसैगरी संस्थाकी सञ्चालक राधा राजकर्णिकारले घरायसी कारण देखाउँदै सञ्चालक पदबाट राजिनामा दिएकाले सुरेन्द्रलाल जोशीलाई रिक्त सञ्चालक पदमा चयन गरिएको छ ।
संस्थाको २४औं वार्षिक साधारणसभाबाट दुवैलाई ती पदमा निर्विरोध चयन गरिएको संस्थाले जनाएको छ । संस्थाले साधारणसभाका अवसरमा ज्येष्ठ नागरिकतर्फ ढ्याईचा महर्जन, उत्कृष्ट ऋणीमा बंगला श्रेष्ठ र उत्कृष्ट कारोबारीमा रिनादेवी बज्राचार्यलाई सम्मान गरेको थियो । त्यसैगरी कोभिड १९ महामारीका बीचमा पनि निरन्तर सदस्यहरुलाई वित्तीय सेवा प्रदान गरेको भन्दै संस्थाका कर्मचारीतर्फ प्रमुख लेखा अधिकृत जिलेन्द्र जोशी, बरिष्ठ सहायक शिवप्रसाद तिम्सिना, रिसेप्सनिष्ट रिता महर्जन र कार्यालय सहयोगी योमाया अवालेलाई सम्मान एवं पुरस्कृत गरिएको थियो ।
सभामा संस्थाका का.वा. अध्यक्ष प्रद्युम्नलाल जोशीले आ.व. २०७७।७८ को वार्षिक प्रतिवेदन प्रस्तुत गरेका थिए । संस्थाले गत असारमसान्तसम्म ४ करोड ७५ लाख शेयरपुँजी, १ अर्ब २८ करोड २५ लाख बचत संकलन र १ अर्ब २९ करोड ८१ लाख ऋण लगानी गरी १ करोड १७ लाख ७५ हजार मुनाफा आर्जन गरेको सभामा जानकारी दिइयो ।
सभामा लेखासमितिको तर्फबाट प्रतिवेदन पेश गर्दै संयोजक रविन्द्र प्रसाद नेम्कूलले समयानुसार बचत र ऋणको ब्याज परिवर्तन गर्दै जान, शेयरपुँजी वृद्धि गर्न, ब्याजलाई पुँजीकृत नगर्न सुझाव दिएका छन् ।
